மாஸ்க் இருந்தால் கணவருக்கு எப்படி முத்தம் கொடுப்பது! டெல்லியில் காவலர்களிடம் ஜோடி வாக்குவாதம்

"மாஸ்க் இருந்தால் என் கணவருக்கு எப்படி முத்தம் கொடுப்பது? நான் யுபிஎஸ்சி தேர்வில் வெற்றி பெற்றுள்ளேன்" என்று காரில் பயணித்தபோது மாஸ்க் அணியாதது குறித்த கேள்வி கேட்டதற்கு திருமணமான ஜோடி டெல்லி காவலர்களிடம் கடும் வாக்குவாதத்தில் ஈடுபட்டனர். அவர்கள் இருவர் மீது ஐபிசி பிரிவின் கீழ் வழக்குப்பதிவு செய்யப்பட்டது.

டெல்லி: காரில் முகக்கவசம் அணியாமல் வந்ததால் காவல் துறையினர் நிறுத்தியபோது அவர்களிடம் கணவன் மனைவி கடும் வாக்குவாதத்தில் ஈடுபட்ட வீடியோ சமூக வலைதளங்களில் வைரலாகியுள்ளது.

கணவன் மனைவி மீது வழக்குப்பதிவு

டெல்லி தர்யா கஞ்ச் பகுதியில் முகக்கவசம் அணியாமல் காரில் வந்த கணவன், மனைவி ஆகியோரை காவல் துறையினர் தடுத்த நிறுத்தினர். இதனால் கோபமடைந்த அவர்கள் காவல் துறையினரிடம் கடும் வாக்குவாதத்தில் ஈடுபட்டனர்.

இதைத்தொடர்ந்து அவர்கள் இருவரையும் காவல் துறையினர் தர்யா கஞ்ச் காவல் நிலையத்துக்கு அழைத்துச் சென்றனர். முகக்கவசம் அணியாமல் இருந்த அவர்கள் மீது விசாரணை நடத்திய காவலர்களுடன் வாக்குவாதத்தில் ஈடுபட்டதாக ஐபிசி பிரிவில் பல்வேறு வழக்குகள் பதிவு செய்யப்பட்டன.

முகக்கவசம் அணியாமல் காவலர்களுடன் வாக்குவாதம்

டெல்லி படேல் நகர் பகுதியில் வசித்துவரும் பங்கஜ், அபா ஆகியோர் காரில் முகக்கவசம் அணியாமல் வந்துள்ளனர். இதையடுத்து காவலர்கள் தடுத்து இதுகுறித்து கேட்டபோது இருவரும் கடும் வாக்குவாதத்தில் ஈடுபட்டனர்.

அப்போது, "நான் யுபிஎஸ்சி தேர்வில் வெற்றிபெற்றுள்ளேன். காரில் பயனிக்கும் நான் எதற்கு முகக்கவசம் அணிய வேண்டும்? என் கணவருக்கு முத்தம் கொடுக்க வேண்டுமென்றால் நான் என்ன செய்வது" என்று கடும் கோபத்தில் காவலர்களிடம் பேசினார் அந்த பெண்மனி.

இதற்கு காவலர் ஒருவர், "யுபிஎஸ்சி தேர்வு முடித்துள்ள நீங்கள் பொறுப்புடன் நடந்துகொள்ள வேண்டும்" என்று பதில் கூறினார்.

வைரல் வீடியோ

கணவர், மனைவி வாக்குவாத்தில் ஈடுபட்டதை டெல்லி காவல் துறையினர் படம்பிடித்து அதனை தங்களது சமூக வலைதளபக்கத்தில் பகிர்ந்தனர். இந்த வீடியோ வைரலான நிலையில் காவர்களிடம் வாக்குவாதத்தில் ஈடுபட்ட ஜோடிகளுக்கு பலரும் கண்டனங்களை தெரிவித்தனர்.

உயர் நீதிமன்றம் உத்தரவு

காரில் தனியாக பயணித்தாலும், பொது இடங்களுக்கு வந்தால் கட்டாயம் முகக்கவசம் அணியவேண்டும் என்று டெல்லி உயர் நீதிமன்றம் ஏப். 7ஆம் தேதி உத்தரவிட்டது.

இதையடுத்து வார விடுமுறை நாள்களில் மால்கள், உடற்பயிற்சி கூடங்கள், அரங்குகள் உள்ளிட்ட பொதுமக்கள் கூடும் இடங்கள் மூடப்படும் என்று டெல்லி முதலமைச்சர் அரவிந்த் கெஜ்ரிவால் கடந்த வியாழக்கிழமை உத்தரவிட்டார். அத்துடன் இந்த உத்தரவானது ஏப். 30ஆம் தேதிவரை அமலில் இருக்கும் என்று தெரிவித்தார்.

டெல்லியில் அதிகரிக்கும் கரோனா பாதிப்பு

கடந்த 24 மணி நேரத்தைப் பொறுத்தவரை டெல்லியில் 25 ஆயிரத்து 462 நபர்கள் கரோனா வைரஸ் தொற்றால் பாதிக்கப்பட்டிருப்பது கண்டறியப்பட்டது. மேலும், 161 நபர்கள் நோய் தொற்றினால் இறந்துள்ளனர்.

இதையும் படிங்க: ‘சாய்ஸ் உங்களுடையது - உங்கள் முகக்கவசம் உங்கள் வாழ்க்கை’